ఈరోజూ తగ్గిన బంగారం ధర.. గరిష్ట స్థాయి నుంచి రూ.7,500 పతనం! | gold rates today fall for 5th day down rs 7500 from record highs silver drops

 

బంగారం ధర పతనమైంది. భారీగా దిగొచ్చింది. ఆల్‌టైమ్ గరిష్ట స్థాయి నుంచి బంగారం ధర ఏకంగా రూ.7,500 పడిపోయింది. మరోవైపు అంతర్జాతీయ మార్కెట్‌లో కూడా ఇదే ట్రెండ్ నడుస్తోంది.

బంగారం ధర వెలవెలబోతోంది. పసిడి ధర నేలచూపులు చూస్తోంది. బంగారం ధర కొనుగోలు చేయాలని భావించే వారికి ఇది ఊరట కలిగించే అంశమని చెప్పుకోవచ్చు. బంగారం ధర బాటలోనే వెండి రేటు కూడా పయనించింది. వెండి కూడా పడిపోయింది.

ఎంసీఎక్స్ మార్కెట్‌లో గోల్డ్ ఫ్యూచర్స్ ధర 0.33 శాతం తగ్గుదలతో 10 గ్రాములకు రూ.48,702కు క్షీణించింది. బంగారం ధర తగ్గడం ఇది వరుసగా ఐదో రోజు కావడం గమనార్హం. వెండి రేటు కూడా భారీగా తగ్గింది. వెండి ఫ్యూచర్స్ ధర 1 శాతం క్షీణతతో కేజీకి రూ.65,866కు పతనమైంది.

గత సెషన్‌లో కూడా బంగారం 0.11 శాతం పడిపోయింది. వెండి ధర 0.64 శాతం దిగొచ్చింది. బంగారం ధర ఆగస్ట్ నెల నాటి ఆల్‌టైమ్ గరిష్ట స్థాయి రూ.56,300 నుంచి చూస్తే ఇప్పుడు ఏకంగా రూ.7,500 వరకు పతనమైందని చెప్పుకోవచ్చు. పసిడి ప్రేమికులకు ఇది శుభవార్త అని చెప్పొచ్చు.

అంతర్జాతీయ మార్కెట్‌లో కూడా బంగారం ధర డౌన్ ట్రెండ్ కొనసాగుతోంది. బలమైన అమెరికా డాలర్ కారణంగా బంగారం ధరలపై ప్రతికూల ప్రభావం పడుతోంది. స్పాట్ గోల్డ్ ధర 0.3 శాతం క్షీణతతో ఔన్స్‌కు 1839 డాలర్లకు తగ్గింది. డాలర్ ఇండెక్స్ 0.12 శాతం పెరుగుదలతో 90.74కు చేరింది.