గోపీచంద్, తమన్నా కబడ్డీ ఆటకు డేట్ ఫిక్స్.. సీటీమార్ | gopichand sampath nandi film seetimaarr to release on april 2nd

 

మ్యాచో స్టార్ గోపీచంద్, మిల్కీ బ్యూటీ తమన్నా భాటియా కబడ్డీ కోచ్‌లుగా నటిస్తోన్న చిత్రం ‘సీటీమార్’. కిందటేడాది ఈ సినిమా ప్రారంభమైంది. ప్రస్తుతం ముగింపు దశలో ఉంది. ఈ చిత్ర విడుదల తేదీని గురువారం ప్రకటించారు.

మ్యాచో స్టార్ గోపీచంద్, మాస్ డైరెక్టర్ సంప‌త్ నంది కాంబినేష‌న్‌లో క‌బ‌డ్డీ నేప‌థ్యంలో తెర‌కెక్కుతోన్న స్పోర్ట్స్ యాక్షన్ మూవీ ‘సీటీమార్‌’. ఈ సినిమాలో ఆంధ్ర మహిళల క‌బ‌డ్డీ జట్టు కోచ్‌గా గోపీచంద్, తెలంగాణ మహిళల క‌బ‌డ్డీ జట్టు కోచ్‌గా మిల్కీ బ్యూటీ ‌త‌మ‌న్నా న‌టించారు. గోపీచంద్ కెరీర్‌లోనే భారీ బ‌డ్జెట్‌, హై టెక్నిక‌ల్ వాల్యూస్‌తో ఈ సినిమా రూపొందుతోంది. పవన్‌ కుమార్ స‌మ‌ర్పణ‌లో శ్రీనివాసా సిల్వర్‌ స్క్రీన్‌ పతాకంపై శ్రీనివాసా చిట్టూరి ఈ చిత్రాన్ని నిర్మిస్తున్నారు. మెలొడీ బ్రహ్మ మ‌ణిశ‌ర్మ సంగీతం సమకూరుస్తున్నారు.

భూమిక కీల‌క పాత్రలో న‌టిస్తోన్న ఈ సినిమా నుండి ఇప్పటికే విడుద‌ల‌ చేసిన గోపీచంద్, త‌మ‌న్నా లుక్స్‌కి మంచి రెస్పాన్స్ వ‌చ్చింది. ఇదిలా ఉంటే, ఈ చిత్ర విడుదల తేదీని నిర్మాత ప్రకటించారు. ఏప్రిల్‌ 2న ప్రపంచ‌ వ్యాప్తంగా విడుద‌ల‌ చేస్తున్నట్లు అధికారికంగా ప్రక‌టిస్తూ స్పెష‌ల్ పోస్టర్‌ని విడుదల చేశారు. చేతిలో పెద్ద సుత్తి ప‌ట్టుకుని టైర్లమీద కూర్చుని ఉన్న గోపీచంద్ మాస్ లుక్‌కి మంచి రెస్పాన్స్ వ‌స్తోంది.

విడుదల తేదీ ప్రకటన సందర్భంగా నిర్మాత శ్రీనివాసా చిట్టూరి మాట్లాడుతూ.. ‘గోపీచంద్ కెరీర్‌లోనే ఇది హై బడ్జెట్, భారీ క‌మ‌ర్షియ‌ల్ ఫిలిం. స్పోర్ట్స్ బ్యాక్ డ్రాప్‌లో సాగే భావోద్వేగభరిత కథాంశమిది. ప్రతి సన్నివేశం హార్ట్‌ ట‌చింగ్‌గా ఉంటుంది. మ‌ణిశ‌ర్మ అద్భుత‌మైన పాట‌ల్ని కంపోజ్ చేశారు. ప్రస్తుతం టాకీ పార్ట్ పూర్తయ్యింది. రెండు సాంగ్స్ మాత్రమే బ్యాలెన్స్ ఉన్నాయి. గోపీచంద్‌, సంప‌త్‌ నంది కాంబినేష‌న్‌లో మా శ్రీనివాసా సిల్వర్‌ స్క్రీన్‌ పతాకంపై ప్రతిష్టాత్మకంగా రూపొందుతోన్న ‘సిటీమార్’ చిత్రాన్ని స‌మ్మర్ స్పెష‌ల్‌గా ఏప్రిల్ 2న ప్రపంచ వ్యాప్తంగా విడుద‌ల‌చేస్తున్నాం’ అని అన్నారు.

ఈ సినిమాలో ఇంకా దిగంగ‌న సూర్యవంశి, పోసాని కృష్ణముర‌ళి, రావు ర‌మేష్‌‌, రెహ‌మాన్, బాలీవుడ్ యాక్టర్ త‌రుణ్ అరోరా ముఖ్య పాత్రలు పోషించారు. ఎస్.సౌందర్ రాజన్ సినిమాటోగ్రఫి అందించిన ఈ చిత్రానికి తమ్మిరాజు ఎడిటర్. సత్యనారాయణ డి.వై. ఆర్ట్ డైరెక్టర్. కథ-మాటలు-స్క్రీన్‌ప్లే-దర్శకత్వం సంపత్‌ నంది.