ట్రాక్టర్ కొనుగోలుదారులకు మోదీ శుభవార్త.. కీలక నిర్ణయం!

 

new emission norms

ప్రధానాంశాలు:

• కొత్త బీఎస్ రూల్స్ అమలుకు గడువు
• వచ్చే ఏడాది వరకు సమయం
• దీంతో కంపెనీలకు, కొనుగోలుదారులకు ఊరట

కొత్తగా ట్రాక్టర్ కొనుగోలు చేయాలని ఆలోచిస్తున్నారా? అయితే మీకు తీపికబురు. కేంద్ర ప్రభుత్వం తాజాగా ట్రాక్టర్ కొనుగోలు చేసే వారికి ఊరట కలిగే నిర్ణయం తీసుకుంది. బీఎస్ నిబంధనల అమలు గడువు నుంచి మినహాయింపు ఇచ్చింది. వచ్చే ఏడాదికి ఈ కొత్త రూల్స్‌ను వాయిదా వేసింది. అంటే ఇప్పుడు ట్రాక్టర్లకు కొత్త బీఎస్ రూల్స్ వర్తించవు.

కన్‌స్ట్రక్షన్ ఎక్విప్‌మెంట్ వెహికల్స్‌కు కొత్త ఉద్గార ప్రమాణాల గడువును ఏప్రిల్ 2021 వరకు, ట్రాక్టర్లకు 2021 అక్టోబర్ వరకు పొడిగించింది. కేంద్ర రోడ్డ రవాణా జాతీయ రహదారుల మంత్రిత్వ శాఖ ఈ మేరకు ఒక నోటిఫికేషన్ జారీ చేసింది. దీంతో ట్రాక్టర్లు, ఇతర కన్‌స్ట్రక్షన్ ఎక్విప్‌మెంట్ వెహికల్స్‌ తయారు చేసే కంపెనీలకు భారీ ఊరట కలుగనుంది.

కాగా కేంద్ర ప్రభుత్వం టూవీలర్లు, ఫోర్‌వీలర్లకు సంబంధించి బీఎస్ 6 ఉద్గార ప్రమాణాలను ఈ ఏడాది ఏప్రిల్ 1 నుంచే అమలులోకి తీసుకువచ్చింది. దీంతో ఇప్పుడు బైక్, స్కూటర్, కారు వంటివి బీఎస్ 6 ఇంజిన్‌తో మార్కెట్‌లోకి వస్తున్నాయి. అయితే బీఎస్ 4 వెహికల్స్‌తో పోలిస్తే బీఎస్ 6 వెహికల్స్ ధర చాలా చోట్ల ఎక్కువగానే ఉంది.

అయితే ఇప్పుడు ట్రాక్టర్లు, ఇతర కన్‌స్ట్రక్షన్ ఎక్విప్‌మెంట్ వెహికల్స్‌కు పాత రూల్స్ వర్తిస్తాయి. కొత్త ఉద్గార ప్రమాణాల అమలుకు మరింత గడువు లభించింది. దీంతో ఇప్పుడు పాత ఉద్గార ప్రమాణాలు కలిగిన ట్రాక్టర్లను కొనుగోలు చేయొచ్చు. ఇకపోతే కొత్త బీఎస్‌ 6 ఇంజిన్ వల్ల పర్యావరణ కాలుష్యం కొంత మేర తగ్గే అవకాశముంది.