ప్రియుడి మోజులో తల్లి, ప్రియురాలి కోసం తండ్రి.. నీచం

 

వివాహేతర సంబంధాల కోసం కన్నవాళ్లే కసాయిలుగా మారారు. కన్నబిడ్డలను సంతలో పశువుల్లా అమానుషంగా అమ్మకానికి పెట్టారు. పదేళ్లు కూడా దాటని కొడుకులను పశువుల కాపరులుగా మార్చేశారు.

 

ప్రతీకాత్మక చిత్రం

కడుపున పుట్టిన బిడ్డలను కంటికి రెప్పలా చూసుకోవాల్సిన తల్లీతండ్రీ దారితప్పారు. వివాహ బంధాన్ని మంటగలిపి అక్రమ సంబంధాలు పెట్టుకున్నారు. విడిపోయి ప్రేమించిన వ్యక్తులతో కలసి బతకాలని నిర్ణయానికి వచ్చారు. ప్రియుడి మోజులో తల్లి, ప్రియురాలి కోసం తండ్రి అమానుష చర్యకు దిగారు. అడ్డుగా ఉన్న కన్నబిడ్డలను సంతలో పశువుల్లా అమ్మేశారు. కొడుకుని కొనుక్కున్న యజమాని వేధింపులు భరించలేక చిన్నారి అంగన్‌వాడీ సెంటర్‌ని ఆశ్రయించడంతో దారుణం వెలుగులోకి వచ్చింది. ఈ అమానవీయ ఘటన ఒడిశాలో వెలుగుచూసింది.

గిరిజన ప్రాంతమైన మల్కన్‌గిరి జిల్లాలోని ఓ గ్రామానికి చెందిన సుక్ర భూమియా, అతని భార్య విడిపోదామని నిర్ణయించుకున్నారు. భర్త తన ప్రియురాలిని, భార్య ఆమె ప్రియుడిని పెళ్లి చేసుకోవాలని నిర్ణయానికి వచ్చారు. అందుకు తమ బిడ్డలు అడ్డుగా ఉన్నారని భావించిన కసాయి దంపతులు కడుపున పుట్టిన పిల్లలను సంతలో పశువుల్లా అమ్మేశారు. అదే గ్రామానికి చెందిన వ్యక్తికి పెద్ద కొడుకు బసుదేవ్(9)ని విక్రయించారు.

బాలుడిని కొనుక్కున్న యజమాని బసుదేవ్‌ని ఆవులకు కాపలా పెట్టాడు. తినడానికి భోజనం మినహా ఏమీ ఇచ్చేవాడు కాదు. యజమాని వేధింపులు భరించలేకపోయిన బసుదేవ్ గ్రామంలోని అంగన్‌వాడీ కేంద్రాన్ని ఆశ్రయించాడు. బాలుడి పరిస్థితి విని కేంద్రం నిర్వాహకురాలు జయంతి ఖరా బాలుడి సంరక్షణ చర్యలు చేపట్టింది. కొద్దిరోజులకే ఆ విషయం తెలుసుకుని బాలుడిని కొనుక్కున్న యజమాని నేరుగా అంగన్‌వాడీ కేంద్రానికి వచ్చి నిర్వాహకురాలు జయంతితో గొడవకు దిగాడు. విషయం సీరియస్ కావడంతో ఆమె ఉన్నతాధికారులకు సమాచారం అందించింది.

రంగంలోకి దిగిన అధికారులు విచారణ చేపట్టడంతో షాకింగ్ విషయాలు వెలుగులోకి వచ్చాయి.
తనకు తమ్ముడు జగన్నాథ్ ఉన్నాడని.. తనని కూడా తండ్రి అమ్మేశాడని చెప్పడంతో అతన్ని కూడా చైల్డ్ లైన్ ప్రతినిధులు సంరక్షించారు. వేర్వేరు పెళ్లిళ్లు చేసుకునేందుకు బిడ్డలను అమ్మేసిన ఘటన ఉన్నతాధికారులకు తెలియడంతో గ్రామానికి వచ్చి విచారణ చేపట్టారు. చిన్నారులు కోరుకుంటే వారి సమీప బంధువులకు అప్పగించేందుకు సిద్ధంగా ఉన్నామని.. లేకుంటే మల్కన్‌గిరిలో చైల్డ్ వెల్ఫేర్ కమిటీకి అప్పగించి విద్య, సంరక్షణ బాధ్యతలు చూసుకుంటామని మతిలి బ్లాక్ డెవలప్‌మెంట్ ఆఫీసర్ ఆశిష్ కుమార్ తెలిపారు.